राम्रो अनलाइन
१२ माघ २०८०, शुक्रबार
काडमाडौँ–तेक्वान्दो आइटीएफ र नेपाल मुआ थाईको केन्द्रीय सदस्य एवं खेलाडी तुलसी थापा मगर जनवरी २७ मा नेदरल्याण्डको हेल्मोण्ड शहरमा आयोजना हुन गइरहेको ‘दी ओपन डच च्याम्पियनसिप तथा सम्मेलन’ मा सहभागी हुने भएकी छिन् ।
नेपाल नेशनल मार्शल आर्टस गेम्स महासंघका केन्द्रीय कोषाध्यक्ष समेत रहेकी मगर विगत २० वर्षदेखि खेलकुदमा क्रियाशील छिन् । विभिन्न राष्ट्रिय तथा अन्तर्राष्ट्रिय प्रतियोगिताहरूमा सहभागी भएर पदक जितेकी उनी मार्शल आर्टस गेम्सको वृद्धि विकासमा सक्रिय छिन् ।
पूर्व प्रधानमन्त्री एवं नेपाली काँग्रेस सभापति गीरिजा प्रसाद कोइरालाको स्मृतिमा स्थापित जीपी कोइराला फाउण्डेशनको युवा तथा खेलकुद विभागकी प्रमुखसमेत रहेकी मगरले फाउण्डेशन मार्फत पनि खेलकुद गतिविधि अघि बढाउँदै आएकी छिन् ।
राष्ट्रिय खेलकुद परिषद्ले आज उनलाई एक कार्यक्रमका बीच सम्मेलनमा सहभागी हुनका लागि बिदाई गरेको थियो । परिषद्का सदस्य सचिव टंकलाल घिसिङले खेलाडी मगरलाई बिदाई गर्दै मार्शल आर्टस गेम्सको वृद्धि विकासमा महत्वपूर्ण योगदान दिएको भन्दै उनको प्रशंसा गरेका थिए ।
