समयको महत्त्व त्यसको लम्बाइमा होइन, त्यसले दिने परिणाममा हुन्छ। २७ घण्टाको भ्रमण छोटो हुन सक्छ, तर त्यसमा गरिने दूरदर्शी संवाद र सही निर्णयले दुई देशको सम्बन्धमा दीर्घकालीन प्रभाव पार्न सक्छ।
सम्माननीय प्रधानमन्त्री बालेन शाहको पहिलो औपचारिक भारत भ्रमणलाई हामीले केवल एउटा कूटनीतिक औपचारिकताका रूपमा होइन, दुई देशबीचको ऐतिहासिक, सांस्कृतिक र जनस्तरको सम्बन्धलाई अझ प्रगाढ बनाउने अवसरका रूपमा हेर्नुपर्छ।
नेपाल र भारतको सम्बन्ध केवल दुई सरकारबीचको सम्बन्ध होइन। यो दुई देशका जनताबीचको आत्मीयता, सभ्यता, धर्म, संस्कृति, भाषा, रीतिरिवाज र पारिवारिक सम्बन्धले जोडिएको सम्बन्ध हो। हाम्रो खानपान, चाडपर्व, परम्परा र सामाजिक जीवनमा धेरै समानता छन्। यस्तो सम्बन्ध राजनीतिक उतारचढावभन्दा माथि उठेर जोगिनुपर्छ।
ज्योतिष शास्त्रमा पनि ग्रहहरूको पारस्परिक दृष्टि, योग र दशाले समयको सम्भावना बुझाउने मान्यता छ। शुभ समयको अर्थ केवल व्यक्तिगत सफलता होइन, सामूहिक हितका लागि सही निर्णय गर्ने अवसर पनि हो। तर ग्रहले संकेत गरे पनि इतिहास निर्माण गर्ने शक्ति विवेक, कर्म र दूरदृष्टिमा निहित हुन्छ।आज नेपालको राष्ट्रिय हितसँग जोडिएका सीमा, व्यापार, पारवहन, ऊर्जा, जलस्रोत, हवाई मार्ग र आर्थिक सहकार्यजस्ता विषयमा स्पष्ट संवाद आवश्यक छ। नेपाल र भारत दुवैले एकअर्काको सार्वभौमिकता, राष्ट्रिय स्वाभिमान र पारस्परिक सम्मानलाई उत्तिकै महत्त्व दिनुपर्छ।
अन्तर्राष्ट्रिय राजनीतिमा छिमेकीको सम्बन्धको आफ्नै विशेष महत्त्व हुन्छ। टाढाका मित्रहरू आवश्यक हुन्छन्, तर नजिकका छिमेकीसँगको विश्वास र समझदारी अझ महत्त्वपूर्ण हुन्छ। छिमेकीको सम्बन्ध शक्ति प्रदर्शनबाट होइन, विश्वास, समानता र सम्मानबाट बलियो हुन्छ।
हामी चाहन्छौँ, नेपाल र भारतबीचको सम्बन्ध सरकार परिवर्तनसँगै बदलिने होइन, जनताको आपसी विश्वासमा आधारित स्थायी सम्बन्ध बनोस्। राजनीति जनताको भावना र राष्ट्रिय आवश्यकताअनुसार चलोस्, कूटनीति व्यक्तिगत स्वार्थभन्दा माथि उठोस्।
सीमा छुट्टिए पनि संस्कृति छुट्टिनु हुँदैन, सरकार फेरिए पनि मित्रता फेरिनु हुँदैन। छिमेकी बदल्न सकिँदैन, तर छिमेकीसँगको सम्बन्धलाई अझ सुन्दर, सम्मानजनक र विश्वासिलो बनाउन सकिन्छ।
सम्माननीय प्रधानमन्त्रीज्यूको भारत भ्रमणले यही विश्वासलाई नयाँ उचाइ प्रदान गरोस्। नेपालको स्वाभिमान सुरक्षित रहोस्, भारतसँगको मित्रता अझ प्रगाढ बनोस् र दुवै देशका जनताले यसको वास्तविक लाभ प्राप्त गर्न सकून्।
शुभयात्रा तथा सफल भ्रमणको हार्दिक शुभकामना !